Munarmedia.kz 13.06.2025 /Астана/-2025 жылдың 11 маусымында Астанадағы EXPO Халықаралық көрме орталығында бір мезетте екі көрме өтті — Цзянсу (ҚХР) провинциясының импорттық және экспорттық өнімдер көрмесі мен EXPOGOODS Central Asia шарасы. Бұл ауқымды іс-шараға қазақстандық және шетелдік өндірушілер қатысып, өз өнімдерін ұсынды.
EXPO орталығында — Қытай басымдықта
Көрмеге қатысушылардың барлығы бір үлкен павильонға орналастырылды. Залдың негізгі бөлігін 70-тен астам қытайлық компания иеленді. Сонымен қатар, Пәкістан, Иран, Ресей, Беларусь және Қазақстаннан келген кәсіпкерлерге де арнайы алаң берілді.
Қазақстандық бизнес, әсіресе, азық-түлік өнімдерімен таныстырса, шетелдік қатысушылар жеңіл өнеркәсіп пен тұрмыстық техника саласындағы тауарларын ұсынды. Көрмеде қытайлық өнімдердің саны мен ауқымы айтарлықтай көп болғаны көзге түсті.
Қытайдың көздегені не?
Цзянсу провинциясының ірі кәсіпорындарының бірі — Jiang SOHO Asia-Europe Connectivity Technology Group партиялық комитетінің мүшесі Гу Наньянь ханым Қазақстанға төртінші рет келіп отырғанын айтып өтті.
«Болашақта Астанада Орталық Азиядағы алғашқы көпфункционалды Цзянсу орталығын салуды жоспарлап отырмыз. Біз Қазақстанды таңдадық, себебі елдеріміз арасындағы қарым-қатынас достық негізде дамып келеді. Мұнда менің көптеген достарым бар, соңғы жылдары Қытай мен Қазақстанның байланысы бұрынғыдан да нығая түсті», — деді ол.
Гу Наньянь сынды бірнеше компания өкілдері Ulysmedia.kz тілшісіне берген сұхбатында Қазақстан нарығына ресми түрде әлі кірмегендерін, алайда бұл бағытта жоспарлар бар екенін растады.
Қазақстандық бизнес бәсекеге қабілетті бола ала ма?
Қытайдан келген бизнес-делегацияның белсенділігі көрме барысында анық байқалды. Олар Қазақстанда бірлескен кәсіпорындар ашуға, инвестициялық жобаларға қатысуға және өндіріс орындарын көшіруге қызығушылық танытып отыр.
Бұл жағдай отандық кәсіпкерлер үшін қос қырлы мүмкіндік: бір жағынан, қытайлық серіктестермен жұмыс істеу арқылы жаңа технологиялар мен капитал тарту мүмкіндігі туындайды. Екінші жағынан, Қазақстан нарығында бәсеке күшейіп, шағын және орта бизнес өкілдеріне қысым артуы мүмкін.
Көрмеде сөз алған қазақстандық кәсіпкерлердің бірі былай деді:
«Қытайлық компаниялармен серіктестікке қарсы емеспіз. Бірақ олардың қаржы, технология және өндірістік қуаты өте үлкен. Егер мемлекет тарапынан отандық бизнеске нақты қолдау болмаса, тең дәрежеде бәсекелесу қиынға соғады».
Қытайдың ықпалы: қауіп пе, әлде мүмкіндік пе?
Қытаймен экономикалық байланыс орнату Қазақстан үшін жаңа нарықтар мен технологиялық жетістіктерге жол ашуы мүмкін. Алайда сарапшылар бұл ықпалды әрдайым тиімді пайдалану үшін ұлттық мүдде мен экономикалық қауіпсіздік мәселесін естен шығармауға шақырады.