Munarmedia.kz 13.11.2025 /Астана/-Қостанайда жер кезегінде тұрған азаматтарға арналып бюджет есебінен салынған 124 жеке үй бос тұр. Бұл мақсатқа 3,9 миллиард теңге жұмсалғанымен, бүгінге дейін бар болғаны бір ғана үй сатылған.
Жаңа тұрғын үйлер «Құнай» шағын ауданында орналасқан. Бағасы салыстырмалы түрде қолжетімді — 26-31 миллион теңге аралығында, яғни құрылыс құны бойынша сатылып жатыр. Алайда тұрғындар тарапынан қызығушылық байқалмай отыр.
Қала әкімдігі мұндай жағдайға таңданысын білдіруде. Себебі ондаған жыл бойы жер телімін күтушілер енді ұсынылған үйлер мен учаскелерден өз еркімен бас тартуда.
Сатылымды жандандыру мақсатында шенеуніктер кезекте тұрған азаматтарға жеке-жеке хабарласып, сондай-ақ өтініш беру құқығын кеңейтті. Енді алғашқы үш мың адам ғана емес, кезекте тұрған барлық 43 мың азамат өтініш бере алады.
Алайда қостанайлықтар әлеуметтік желілерде үйлердің сапасының төмендігін, инфрақұрылымның жоқтығын және қала орталығынан қашықтығын айтып шағымдануда. Тұрғындардың пікірінше, осындай сомаға қала ішінде пәтер сатып алу әлдеқайда тиімді.
Егер үйлер бос күйінде қала берсе, әкімдікке олардың күтіп ұстау және коммуналдық төлемдерін төлеу бойынша қосымша шығындар көтеруге тура келеді.