Munarmedia.kz 09.12.2025 / Астана Қазақстанның Қаржы мониторингі агенттігі (ҚМА) ел аумағында тыйым салынған онлайн-казиноларды қамтамасыз еткен ауқымды трансұлттық қаржы схемасын анықтап, жолын кесті. Арнайы операция барысында тоғыз адам қамауға алынды. Тергеу мәліметінше, көлеңкелі қаржы айналымының жалпы көлемі 1 миллиард АҚШ долларына жуықтаған.
ҚМА хабарлауынша, заңсыз жүйені іске асыру үшін бірқатар финтех-сервистердің иелері букмекерлік компаниялармен жасалған жалған келісімшарттар арқылы «сұр» POS-терминалдар мен Terminal ID-лерді пайдаланған. Қылмыстық тізбекке жиырмадан астам төлем ұйымы мен банктердің жекелеген қызметкерлері тартылған. Бұл қылмыстық топтың ауқымы мен ұйымдасу деңгейінің жоғары болғанын көрсетеді.
Схеманың негізгі бөлігі ретінде төрт онлайн-казиноға техникалық қолдау көрсеткен ірі колл-орталық жұмыс істеген. ҚМА жойған бұл орталықта Қазақстан, Ресей, Беларусь, Испания және Вьетнам азаматтарынан құралған 120 қызметкер болған. Орталық ұйымдастырушылары «дропперлік» бағдарламаны да басқарып отырған. Сол арна арқылы 200 миллион USDT көлемінде криптовалюта қозғалысы жүзеге асқан.
Істі дәлелдеу мақсатында 70-тен астам тінту жүргізілді. Қазір тоғыз күдікті қамауда. Ал сегіз адамға қатысты, олардың арасында шетел азаматтары да бар, халықаралық іздеу жариялау үшін материалдар дайындалып жатыр.
Құзырлы орган бұл істі Қазақстан аумағындағы ең ірі көлеңкелі онлайн-құмар ойын желілерінің бірі деп бағалап отыр.