Munarmedia.kz 13.12.2025 /Астана/ Қазақстандық әнші Димаш Құдайберген Біріккен Ұлттар Ұйымының Халықаралық көші-қон ұйымының (ХКҰ, IOM) жаһандық ізгі ниет елшісі мәртебесіне ие болды. Бұл туралы ресми хабарландыру 8 желтоқсанда Женева қаласында өткен Ұйым кеңесінің жыл сайынғы сессиясында жарияланды.
ХКҰ Бас директоры Эми Поуп салтанатты іс-шара барысында өнер иесін жеке құттықтап, Димаш Құдайбергеннің өз таланты арқылы тек тыңдармандардың жүрегіне жол тауып қана қоймай, дағдарыстардан зардап шеккен адамдардың үнін естіртуге де үлес қосып келе жатқанын атап өтті.
Бұл тағайындау Димаш Құдайбергеннің гуманитарлық қызметіндегі жүйелі жұмысының заңды жалғасы саналады. Ол 2024 жылдан бастап ХКҰ-ның өңірлік елшісі ретінде қауіпсіз көші-қон мәселелеріне, сондай-ақ адам саудасына қарсы күреске халықаралық қоғамдастықтың назарын аударуға белсенді атсалысып келеді.
«Халықаралық көші-қон ұйымымен бірлескен жұмыс — менің өмірім мен шығармашылық жолымдағы ең маңызды кезеңдердің бірі», — деді әнші БҰҰ делегаттары алдында сөйлеген сөзінде. Ол алдағы уақытта да инклюзивтілік, адам құқықтарын қорғау және гуманизм құндылықтарын ілгерілетуге күш салатынын жеткізді.
Салтанатты рәсімнің қорытындысында Димаш Құдайберген жиналған қауымға өзінің кеңінен танымал «S.O.S d’un terrien en détresse» атты композициясын орындап берді.