Munarmedia.kz 29.12.2025 /Астана/
Алматы қаласында бірқатар мұғалімдер «Қазақстан Республикасының білім беру саласының құрметті қызметкері» атағын алу үшін алаяққа ақша төлеп, нәтижесінде әрі қаржысынан, әрі уәде етілген марапаттан айырылған.
Тергеу материалдарына сәйкес, 49 жастағы Оксана Жирнова педагогтарға мемлекеттік награданы «заңды жолмен рәсімдеп беруге» уәде еткен. Ол әр адамнан 450 мың теңгеден (шамамен 1 мың АҚШ доллары) талап етіп, бұл қызметті жеке бизнес ретінде ұсынған.
Оксана Жирнова ғылыми ортада белгілі тұлға болған. Ашық дереккөздерде оның Satbayev University-де философия докторы (PhD) дәрежесін қорғағаны туралы бейнематериалдар бар. Сонымен қатар ол ұзақ уақыт «Халықаралық информатизация академиясында» қызмет атқарған. Алайда 2024 жылы бұл мекемеден кеткеннен кейін, білім беру саласына қатысты марапаттарды «сатумен» айналыса бастаған.
Күдікті өз таныстары арқылы мектептермен байланыс орнатып, «Құрметті қызметкер» атағын ақылы түрде алуға болады деген ұсыныс жасаған. Нәтижесінде 8 мұғалім бұл ұсынысқа келісіп, ақшаны тікелей Жирнованың есепшотына аударған.
Алайда уәде етілген атақ та, медаль да берілмеген. Осыдан кейін жәбірленушілер полицияға арызданған. Құқық қорғау органдарында олар өздерін ақтап, бұл төлемдерді «пара емес, тек марапатты дайындау шығыны» ретінде аударғандарын мәлімдеген.
2025 жылғы қыркүйекте Оксана Жирнова ұсталып, алаяқтық дерегі бойынша қамауға алынған. Қазан айында қылмыстық іс сотқа жолданған. Сот барысында айыпталушы өз кінәсін мойындамай, жәбірленушілермен арадағы қатынасты азаматтық-құқықтық келісім ретінде бағалаған.
Алайда сот Жирнованың кінәсі дәлелденді деп таныды. Судья Дастан Әлмағамбетов үкім шығарып, амнистияны ескере отырып, айыпталушыны 2 жыл 4 айға орташа қауіпсіздік колониясына қамау туралы шешім қабылдады. Сондай-ақ ол жәбірленушілерге 3,6 млн теңге көлемінде материалдық шығынды өтеуге міндеттелді.
Үкім әзірге заңды күшіне енген жоқ.