Munarmedia.kz 15.04.2026 /Astana/-Қазақстандықтардың мобильді аударымдарына байланысты банктер 15 сәуірде бірінші тоқсан бойынша деректерді салық органдарына жолдауды аяқтайды.
2026 жылдың қаңтар–наурыз айлары бойынша қазақстандықтардың мобильді аударымдары туралы деректер салық органдарына беріледі. Бұл — елдегі аударымдарды бақылау жүйесінің толық іске қосылғанын білдіреді.
Мамандардың айтуынша, мобильді аударымдарды бақылау 2022 жылдан бастап кезең-кезеңімен енгізілген. Алғашында тек мемлекеттік қызметкерлер тексерілсе, кейін бюджет саласы, квазимемлекеттік сектор қызметкерлері, кәсіпкерлер және олардың жұбайлары қамтылды.
2025 жылдан бастап бақылау барлық жеке тұлғаларға таралды.
2026 жылдан бастап келесі үш шарт қатар орындалса ғана деректер салық органдарына беріледі:
айына кемінде 100 түрлі адамнан аударым алу;
мұндай аударымдардың үш ай қатарынан түсуі;
үш айдағы жалпы сома 12 ең төменгі жалақыдан (2026 жылы — 1 020 000 теңге) асуы.
Егер осы талаптардың бірі орындалмаса, мәліметтер жіберілмейді.
Есепке басқа жеке тұлғалардан түскен барлық түсімдер кіреді:
мобильді аударымдар;
IBAN арқылы жасалған аударымдар;
үшінші тұлғалар терминал арқылы салған қаражат.
Салық органдарына тек талаптарға сай келетін тұлғалар бойынша жиынтық ақпарат жіберіледі:
ЖСН;
жіберушілер саны (100 және одан көп);
есепті кезеңдегі жалпы сома.
Деректерді алғаннан кейін Мемлекеттік кірістер комитеті камералдық бақылау жүргізеді. Одан кейін азаматтарға салық төлеушінің кабинеті арқылы хабарлама жолданады.
Хабарламаға аударымдар тізімі қоса беріледі. Егер қаражат кәсіпкерлік табысқа ұқсаса, азаматтан түсініктеме талап етіледі.
Хабарлама алу — автоматты түрде айыппұл салынды дегенді білдірмейді. Азаматқа 30 жұмыс күні ішінде жауап беру мүмкіндігі беріледі.
1. Түсініктеме беру
Аударымдардың жеке мақсатта болғанын дәлелдеуге болады (қарыз қайтару, көмек, ортақ жинақ). Мұны растайтын құжаттар қажет.
2. Келісіп, түзету
Егер табыс кәсіпкерлікке қатысты болса:
ЖК ретінде декларация тапсырып, салық төлеу;
тіркелмеген жағдайда — ЖК ашу талап етілуі мүмкін.
Тіркеусіз кәсіпкерлік үшін айыппұл қарастырылған — 15 АЕК (2026 жылы шамамен 64,9 мың теңге).
3. Шағымдану
Келіспеген жағдайда хабарламаны жоғары органға немесе сотқа шағымдануға болады.
Ақпарат банктер мен Мемлекеттік кірістер комитеті жүйесі арасында «электрондық үкімет шлюзі» арқылы қорғалған арналармен жеткізіледі. Құпия деректерді жариялағаны үшін қылмыстық жауапкершілік қарастырылған.
2022 жылы Қазақстан Республикасының Қаржы министрлігі Салық кодексіне өзгерістер енгізіп, банктерді кәсіпкерлік белгілері бар аударымдар туралы мәлімет беруге міндеттеген.
2026 жылдың 1 қаңтарынан бастап жүйе толық іске қосылды: банктер деректерді тоқсан сайын береді, ал салық органдары камералдық бақылау жүргізеді.
Вице-министр Ержан Біржан айтуынша, алғашқы хабарламалар қазақстандықтарға 2026 жылдың мамыр айынан бастап жіберіледі.
#салық #мобильдіаударым #Қазақстан #жаңалықтар #қаржы #Munarmedia