Қазақстандағы 51% оқушының компьютерлік сауаты жоқ

Биыл ақпан айының соңында ICILS-2023 нәтижесі шықты. ICILS — компьютерлік және ақпараттық сауат деңгейін бағалайтын халықаралық зерттеу.

Қазақстанда тестілеу орыс және қазақ тілдерінде жүргізілді. Тестке 8-сынып оқушылары қатысқан. Осы тестілеуден Қазақстан 407 балл жинады.

Қазақстан Румыния (440) мен Косовоның (379) ортасында тұр. Компьютерлік сауаты мықты, ең көп балл жинаған елдер — Корея (540) мен Чехия (525).

Негізі ICILS шкаласы 4 деңгейге бөлінеді. Қазақстандағы 51% оқушы ең төмен деңгейдегі балл жинаған. Яғни, олардың компьютерлік сауаты нашар.

Әрине, «Цифрлы Қазақстан» үшін бұл статистика тым күлкілі. Бірақ мақтанатын нәрселер де жоқ емес. Біздің елдің нәтижесі 2018 жылмен салыстырғанда өскен.