Munarmedia.kz 10.11.2025 /Астана/-Бүгін Астанадағы Министрліктер үйінің 16-шы кіреберісі алдында әскерде қаза тапқан сарбаздардың аналары наразылыққа шықты. Бұл жерде Президент Әкімшілігі азаматтардың өтініштерін қабылдайды.
Аналар армия жүйесін реформалап, балаларының өліміне қатысты әділ тергеу жүргізуді талап етті.
— «Сарбаздардың өлімі тоқтауы керек! Әділ тергеу болсын! Әділ сот болсын!» — деп айқайлады наразылардың бірі.
Тағы бір әйел ашуға булығып:
— «Дәлелдерді жойып жатыр, кінәлілер жазадан құтылып кетеді, ал біздің балалар қаза табуда! Неге оларды жауапқа тартпайды? Ең көп жазасы — салғырт офицерді жұмыстан босату ғана. Бұл — заң бұзушылық!» — деді.
Полиция өкілдері бірнеше рет аналарға ескерту жасап, тәртіпті сақтауды сұрағанымен, әзірге күш қолданбай, қасында бақылап тұр. Бұрышта бір қызметтік көлік дежурде тұр.
Әскерде көз жұмған сарбаздардың ата-аналары мұндай үндеуді жиі көтереді. Олар балаларының өз-өзіне қол салғанына сенбейді және әр жолы әділ тергеу жүргізуді талап етеді.