Munarmedia.kz 12.12.2025 / Астана/ Қазақстанда қару-жарақ өндірісін жергілікті деңгейде дамытуға бағытталған ірі қорғаныс жобасы — ASPAN индустриялық кластері іске асырылуда. Жобаның құрамында төрт кәсіпорын бар, олардың әрқайсысы оқ-дәрі өндірісінің негізгі компоненттерін шығаруға маманданбақ. Бұл туралы «Great Sky» компаниясының бас директордың бірінші орынбасары Андрей Тихоненко мәлім етті.
ASPAN-1: алғашқы зауыттың құрылысы жүріп жатыр
Қазіргі уақытта кластердің алғашқы нысаны — ASPAN-1 зауыты салынуда. Бұл кәсіпорын артиллериялық снарядтар мен миналарға арналған корпустарды өндіретін негізгі өндірістік базаға айналады.
Тихоненконың айтуынша, жоба Қазақстанның ішкі ресурстық мүмкіндіктеріне сүйенеді:
– «Жобаның болашағы зор, себебі металл, мақта, қышқылдар және басқа да қажет материалдарды қоса алғандағы шикізаттың барлығы Қазақстанда бар», — деді ол.
Өнім түрлері: ұлттық және НАТО стандарттары
Жобаның өндірістік бағдарламасы кең ауқымды. Кәсіпорындар шығаратын өнімдер қатарында:
-
Қазақстан армиясында қолданылатын 82 мм, 120 мм, 122 мм және 152 мм миномет миналары мен артиллериялық снарядтар;
-
Экспортқа арналған НАТО стандарты бойынша 155 мм (M107, M795) артиллериялық снарядтар және 60 мм миналар бар.
Бұл ASPAN жобасының аймақтық және халықаралық нарыққа бағытталған әлеуетін арттырады.
Құрылыс құны және іске қосу мерзімі
Алғашқы зауыт — ASPAN-1 — өзінің алғашқы өнімін 2027 жылы шығаруы жоспарланып отыр. Жобаның жалпы құны шамамен 500 млрд теңгені (шамамен 1 млрд АҚШ доллары) құрайды.
Жобаның іске асуы Қазақстанның қорғаныс өнеркәсібін технологиялық жаңғыртуға, импортқа тәуелділікті азайтуға және жоғары қосылған құнды экспорттық өнімдер өндірісін қалыптастыруға мүмкіндік береді.