Munarmedia.kz. 31.08.2026. ASTANA– Қазақстанда бұған дейін іздеу жарияланған бельгиялық кәсіпкер және инвестор Фрэнк Джозеф Монстрей Ресейде де қылмыстық іздеуге жарияланды. Бұл туралы ресейлік БАҚ пен ашық дереккөздер хабарлады. (fbrk.kz)
Ресей Ішкі істер министрлігінің іздеу базасында Монстрейдің пайда болғаны туралы ақпарат тамыз айының соңында тарады. Алайда Ресей тарапы оның қандай қылмыстық іс бойынша іздестіріліп жатқанын әзірге жариялаған жоқ.
Бұған дейін, 2026 жылғы 20 мамырда, Қазақстанда Фрэнк Монстрейге қатысты іздеу ісі тіркелген. Қазақстан Бас прокуратурасының құқықтық статистика және арнайы есепке алу порталындағы мәліметке сәйкес, іздеудің бастамашысы – Қазақстанның Ұлттық қауіпсіздік комитеті, ал істі оның Сыбайлас жемқорлыққа қарсы іс-қимыл қызметі жүргізіп жатыр. Қылмыстық істің бабы мен өзге де мән-жайлары тергеу мүддесіне байланысты ашылмаған. (Ақ Жайық)
Фрэнк Монстрей кім?
Фрэнк Джозеф Монстрей – Қазақстанның мұнай-газ секторында ұзақ уақыт жұмыс істеген бельгиялық кәсіпкер. Ол Zhaikmunai компаниясымен байланысты. Кейін бұл компания Nostrum Oil & Gas атауымен жұмыс істеді.
Ашық деректерге сәйкес, Монстрей 2004 жылы Zhaikmunai компаниясын сатып алған. 2011 жылы компания Лондон қор биржасына шығарылды. 2017 жылы кәсіпкер өзіне тиесілі акцияларын сатқан. (dialog.kz)
Монстрейдің аты бұған дейін Қазақстанның экс-банкир Мухтар Аблязовқа қатысты қаржылық даулар мен журналистік зерттеулерде де аталған. Кейбір зерттеулерде кәсіпкермен байланысты құрылымдардың Аблязов пен BTA Bank ісіне қатысты қаржы операцияларына қатысы болуы мүмкін екені айтылған. Монстрей мұндай айыптауларды жоққа шығарған. 2018 жылы Nostrum Oil & Gas пен BTA Bank арасындағы ықтимал талаптарға қатысты өзара келісім жасалған. (fbrk.kz)
Қазақстандағы активтері кімге өтеді?
Монстрейдің есімі қайтадан Қазақстанның мұнай-газ активтеріне қатысты мәміле аясында да аталып отыр.
17 тамызда 2026 жылы Nostrum Oil & Gas Қазақстандағы активтерін Altaris Holding компаниясына сату туралы келісім жасалғанын жариялады. Мәміленің жалпы құны 304,6 млн долларды құрайды. Сома мәміле аяқталған кездегі таза борыш, айналым капиталы және ақша қаражаты көлеміне қарай түзетілуі мүмкін. (Интерфакс)
Мәмілеге Zhaikmunai LLP және POSITIV Invest LLP компанияларындағы үлестер, сондай-ақ олармен байланысты кредиттік келісімдер бойынша құқықтар кіреді.
Altaris Holding компаниясы Fincraft Energy Holding Limited және Alturion Holding Limited арқылы бақыланады. Мәмілені жүзеге асыру үшін Қазақстанның тиісті мемлекеттік органдарының келісімі және бірқатар корпоративтік рәсімдер қажет. (Интерфакс)
Zhaikmunai Батыс Қазақстан облысындағы Чинаревское кен орнын игеру құқығына ие. Ал POSITIV Invest Каменское және Каменско-Тепловско-Токаревское учаскелеріндегі жер қойнауын пайдалану құқықтарына ие. (forbes.kz)
Осылайша, Фрэнк Монстрейдің Қазақстанда және Ресейде іздеуге жариялануы оның бұрынғы іскерлік қызметіне қатысты жаңа құқықтық мәселелердің пайда болғанын көрсетеді. Алайда екі елдегі қылмыстық істердің нақты байланысы және Монстрейге тағылған ықтимал айыптар әзірге ресми түрде жарияланған жоқ.