Бас прокуратура «Қорғас ісі» бойынша күдіктілерге жасалған азаптау туралы сауалға жауап ретінде бұрынғы сенатор әрі экономикалық және сыбайлас жемқорлық қылмыстарымен күрес агенттігінің (АБЭҚК) бұрынғы төрағасы Қайрат Қожамжаровтың атын атады, деп хабарлайды агенттік тілшісі.
«2025 жылғы 27 ақпандағы (…) Қазақстан Республикасының экономикалық және сыбайлас жемқорлық қылмыстарымен күрес агенттігінің (қаржы полициясы) бұрынғы төрағасы Қожамжаров Қ.П.-ға қатысты сауалыңыз қаралды. Бас прокуратура ауыр немесе аса ауыр қылмыстық іс бойынша дәлелдерді бұрмалау фактілеріне байланысты «Қорғас ісіне» қатысты қылмыстық істерді тергеуде», – деп жауап берді КазТАГ редакциясының сауалына Бас прокуратураның сотқа дейінгі тергеу қызметі бастығының орынбасары Н.Ережепов.
Бұған дейін еліміздің бас қадағалау органына келесі мазмұнда сұрау салынған болатын: «КазТАГ редакциясына түскен мәліметке сәйкес, Алматы прокуратурасы келесі тұлғаларға қатысты жаңа айыптау актісін әзірледі: АБЭҚК арнайы департаментінің ұйымдасқан қылмысқа қарсы күрес бөлімінің бұрынғы бастығы Талғат Әбдірахманов, АБЭҚК арнайы департаментінің жедел-іздестіру қызметін ұйымдастыру жөніндегі бақылау-әдістемелік басқармасының «Р» бөлімінің бұрынғы аға инспекторы Қасым Әбубәкіров және Астана қаласы бойынша қылмыстық-атқару жүйесі департаменті (ҚАЖД) бастығының режим және жедел жұмыс жөніндегі бұрынғы орынбасары Бекболат Мейрамбеков. Оларға 2011 жылы «Қорғас ісі» бойынша күдіктілер Т.Н.Қайырбаев пен Б.А.Отарбаевқа ауыр азаптау жасағаны үшін айып тағылды. Мәліметке сәйкес, Қайырбаевты азаптаудан кейін бұрынғы АБЭҚК төрағасы Қайрат Қожамжаров өз кабинетінде қабылдап, АБЭҚК қызметкері Талғат Татубаевтың қатысуымен оны ҰҚК қызметкерлерін айыптауға мәжбүрлеген».
«Аталған ақпаратты растауды немесе жоққа шығаруды, сондай-ақ түсініктеме беруді сұраймыз», – деп жазды редакция өз сауалында.
Бұл мәселеге қатысты КазТАГ 26 ақпанда «Қожамжаров азаптаудан кейін күдіктілерді ҰҚК қызметкерлеріне жала жабуға мәжбүрледі – дереккөз» атты материал жариялаған болатын.
Еске сала кетейік, 2023 жылғы 11 желтоқсанда КазТАГ Қайрат Қожамжаровтың бұрынғы қоластындағы қызметкері, экс-қаржы полициясының қызметкері Ұлан Мәдиевтің азаптау ісі бойынша ұсталғанын хабарлаған. Кейін редакция «Қорғас ісінің» жалғасын тапқанын мәлімдеді. Бұрынғы сенатордың қоластында жұмыс істеген адамдарға тағылған айыптардың арасында «Қорғас ісі» бойынша күдікті болған қыздарды зорлау деректері де бар. Бұл істе Қожамжаровтың жақын серіктері – экс-қаржы полициясының жоғары лауазымды қызметкері Талғат Татубаев және Алматы облысы бойынша қаржы полициясының экс-басшысы Сергей Потаниннің есімдері аталады. Мәліметтерге қарағанда, Қожамжаров олардың мансаптық өсуіне ықпал еткен.
2023 жылғы 15 желтоқсанда «Қорғас ісі» бойынша тергеудің қайта жанданғаны ресми түрде расталды, ал 2024 жылғы 9 қаңтарда КазТАГ тағы бір экс-қаржы полициясы қызметкері Кенжебай Жұмабековтің ұсталғанын хабарлады. Ол Алматы қалалық қаржы полициясының бұрынғы қызметкері болған және агент Талғат Махатовпен тығыз байланыста деп саналады.
2024 жылғы 18 наурызда «Қорғас ісі» бойынша кеденші Медет Жамашевтың тапсырыспен өлтірілуіне қатысты куәгер Талғат Қарабаев АБЭҚК басшылығына берілген пара сомасын атады.
Шілде айында сотта Қайрат Қожамжаров туралы ашық айғақтар айтылды.
2024 жылғы 29 тамызда кеденші өліміне байланысты сот үкімі шықты. Тапсырыс беруші ретінде Махатов («Бетон») танылып, 20 жылға бас бостандығынан айырылды. Сонымен қатар, аталған істе «Хуторские» ұйымдасқан қылмыстық тобының мүшесі Ержан Қасымбаев та сотталды.
2025 жылғы 8 қаңтарда КазТАГ сотқа Махатовқа қатысты жаңа қылмыстық іс түскенін хабарлады.
Фото дереккөзі: egemen.kz